Håkon Bleken årets Peer Gynt-kunstnar

Bleken har vore ein av dei mest markante skikkelsane i norsk kulturliv gjennom mesteparten av etterkrigstida, og er ein av våre absolutt fremste samtidskunstnarar. Han har ein stor og variert produksjon bak seg, med hovudvekt på grafikk og måleri. Sidan debuten i 1951 har Bleken hatt ei rekkje separatutstillingar i alle våre viktigaste galleri, mellom anna Nasjonalgalleriet og Henie-Onstad Kunstsenter. Han har også hatt fleire utstillingar utanlands, og han er kjøpt inn av dei fleste store museum og institusjonar i Noreg.

Bleken har gjort store utsmykkingsoppdrag, og han vant konkurransen om det offisielle signingsbiletet av kong Harald og dronning Sonja i 1991. Biletet henger i dag i Stiftsgården i Trondheim. Han har også portrettert fleire kjente personar, mellom andre kong Olav. I 1999 vart han utnemnd til St. Olavs orden, riddar av 1. klasse.

Sentrale tema hos Bleken er eit sterkt samfunnsengasjement og menneskeleg liding – tema som grip direkte inn i Henrik Ibsens Peer Gynt.