Øivind Berghs minnepris til Eldbjørg Hemsing

Øivind Berghs minnepris skal ifølgje statuttane gå til unge, lovande felespelarar, gjerne med røter innan folkemusikken. Det er styret i Landslaget for spelemenn saman med representantar frå familien Bergh og Peer Gynt as som avgjer kven som får prisen, som er på 25.000 kroner. Her er deira grunngjeving:

”Eldbjørg Hemsing  frå Valdres er tildelt Øivind Berghs Minnepris for 2007. Det norske folk har vorte kjent med dette flotte talentet gjennom konsertar og fjernsyn, blant anna i Kjempesjansen på NRK i fjor haust der ho deltok i lag med søstera si, Ragnhild.

17 år gamle Eldbjørg Hemsing er ein merittert fiolinist  og har vunne fleire 1. prisar i nasjonale og internasjonale kåringar. Ho har alt rukke å vere solist med fleire profesjonelle orkester her i landet, ute i Europa og i  USA.  Ho har motteke ei  rekkje stipend og prisar,  blant anna Talentprisen frå Norsk Kulturskoleråd og Norsk Musikkforleggers Ærespris. Ho byrja å spele fiolin da ho var 5 år. Ho har vore elev av  Alf Richard Kraggerud og har dei siste åra studert med Stephan Barratt-Due ved Barratt Dues musikkinstitutt i Oslo.

Eldbjørg spelar også  norsk tradisjonsmusikk på hardingfele, og ho har gått i slåttelære hos spelemannen Jan Beitohaugen Granli i Valdres. Eldbjørg  oppfyllar dermed alle kriterium i denne samanhengen  og er ein svært verdig mottakar av  Øivind Berghs Minnepris”.

Øivind Berghs minnepris blir delt ut under folkemusikkonserten ”Dans med me’, Solveig” på Rudi Gard fredag 10. august.